اقترب نادي الزمالك بشكل رسمي من حسم التعاقد مع حارس مرمى النادي الأهلي محمود الزنفلي بعد انتهاء إعارته للنادي الأهلي قادما من نادي الداخلية.
وكشفت مصادر داخل نادي الزمالك أن الحارس أبدى موافقته على اللعب للزمالك بعد انتهاء إعارته للنادي الأهلي ورفض الأهلي فكرة تفعيل بند الشراء الموضوع في عقده وخاصة بعد أزمته مع المدير الفني السويسري مارسيل كولر.
وعن أزمة اللاعب مع كولر، قال الصحفي والناقد الرياضي عمرو ثروت، على صفحته الرسمية بموقع التواصل الاجتماعي “فيسبوك” محمود الزنفلي حارس الأهلي كان عنده جلسة مع مارسيل كولر امس الأول، وطلب فيها السويسري من اللاعب تجهيز نفسه للمشاركة في المباريات المتبقية من البطولة أمام زد وانبي ومودرن سبورت، وكولر أكد لحارس الأهلي إنه في حالة عدم الحسم أمام سموحة لن يتواجد أيضا أمام زد في مباراة الأحد القادم وإن مشاركته لن تكون الا بعد التتويج رسميًا.
وأضاف: الزنفلي تحفظ على طلب كولر وقاله انه يرغب في الوقوف على مستقبله مع الفريق خاصة وأن عنده عروض محلية وعايز يعرف مصيره مش بس كدة الزنفلي قاله كمان إزاي هلعب مع ناشئين وده ممكن يأثر علي مستقبلي إني استقبل أهداف كتير وبالتالي مافيش حد هيرضى يشتريني، الجلسة انتهت الي هذا الأمر وكولر قاله هنبقي نرتبها.
واستطرد في تصريحاته قائلا: الزنفلي بعدها بلغ خالد الجوادي مترجم كولر في حضور ميشيل يانكون انه رافض يلعب مع الناشئين وأنه هيلعب بس لو مع الكبار لانه لاعب كبير وعنده أرقام كويسة وعلى أساسها تم التعاقد معاه (لمعلوماتك إدارة الأهلي هي من فرضت الزنفلي على الجهاز الفني وقت أزمة فشل صفقة أبو جبل ويانكون كان رافض الصفقة تماما)، يانكون و الجوادي وصلوا رسالة الزنفلي الأخيرة الي كولر وتم استدعاء الزنفلي بعد المران الأخير قبل مباراة سموحة وكولر كان غاضب من اللاعب ، وقاله انت قولت انك مش هتلعب مع الناشئين لو حسمنا الدوري قاله آه قولت قاله تمام انا مضطر اعتمد على مصطفي مخلوف اللي هيكون بديل لمصطفى شوبير عشان نجهزه للمرحلة الجاية الزنفلي قاله معنديش مشكلة.
وواصل حديثه قائلا: الزنفلي قبل جلسة كولر الأخير استشف من بعض اللاعبين الذين لا يشاركوا بشكل أساسي مع الأهلي عن مشاركتهم بعد حسم الدوري والكل قاله (إحنا هناخد اجازة) وده خلي الزنفلي يتمسك بموقفه تحت شعار (أنا مش هشيل الليلة لوحدي واستقبل أهداف مع ناشئين)، وخلينا أزود لك معلومة كمان وهي ان الزنفلي كان متضايق أصلا من فكرة اللعب مع الناشئين في وقت سابق ومن طريقة تعامل يانكون كمان معاه، وكان رافض ولكن يانكون قاله ده السيستم بتاع الأهلي ولازم تنفذ المطلوب منك حتي لو هتلعب مع الناشئين ومحدش هنا بيقول لا .. الزنفلي قاله الكلام ده لو إنت شارينى لكن أنا إعارة.. خلص معايا بعقد نهائي وانا اعملك اللي انت عايزه ورغم كدة الزنفلي شارك مع الناشئين رغم إعتراضه على الأمر وكل مرة كان بيتقاله دي اخر مرة هنزلك تلعب مع الناشئين.
واختتم منشوره قائلا: كولر قال للزنفلي في نهاية الجلسة لو حابب تاخد اجازة تمام ممكن خلاص تاخد اجازة وتشوف مستقبلك واللاعب قاله مافيش مشكلة وقدم له الشكر على الفترة اللي تواجد فيها مع الأهلي و إنه ارتبط إسمه بالنادي و لمعلوماتك الزنفلي كان ملتزم جدا في جميع الجلسات السابق ذكرها ولم يصدر منه أي شي يدينه في الحديث مع أعضاء الجهاز الفني وكان ملتزم بأقصى درجات ضبط النفس، وخليني اقولك المفاجأة كمان ان الزنفلي كان مخلص مع الزمالك في يناير إللي فات، ولكن الصفقة فشلت بعد دخول الأهلي في الصفقة للحصول على خدماته على سبيل الإعارة واللاعب وقتها فضل عرض الأهلي إللي مكنش يترفض وقتها، ونقطة تانية مهمة الزنفلي دلوقتي عنده عرض من الزمالك وأكثر من عرض محلي وهيحسم موقفه منهم خلال أيام.
يذكر أن نادي الزمالك كان قد حسم أمره برفض التجديد مع حارس مرمى الفريق محمد عواد وقرر تصعيد حارس الناشئين محمود الشناوي لتعويض غياب الحارس الأساسي محمد صبحي بعد إصابته في الكتف.
